దిగజారుతున్న నిమ్స్‌ ప్రతిష్ట

-   వారం నుంచి మూతబడ్డ క్యాథ్‌ల్యాబ్‌
-   డయాలసిస్‌కు కరువైన ట్యూబులు
-   కంటతడిపెడుతున్న రోగులు
     ప్రజాశక్తి - హైదరాబాద్‌ బ్యూరో
    రోజు రోజుకు నిమ్స్‌ ప్రతిష్ట దిగజారుతోంది. వారం నుంచి క్యాథ్‌ల్యాబ్‌ మిషన్‌ చెడిపోయినా అధికారులు పట్టించుకోవడం లేదు. కిడ్నీలు చెడిపోయి డయాలసిస్‌తో బతికే రోగులు నరకం చూస్తున్నారు. డయాలసిస్‌కు ట్యూబులు లేక గంటలతరబడి వేచి చూడాల్సిన పరిస్థితి ఉంది. ఇంతకు ముందు నిమ్స్‌కు వినాశనానికి కారణమైన ఆ నలుగురు పరిపాలనాధికారులు ఇప్పుడూ అదే పనిలో నిమగమయ్యారు. ఇంత జరుగుతున్న నిమ్స్‌ డైరెక్టర్‌ తమాషా చూస్తున్నారనే విమర్శలు వస్తున్నాయి.
   నిమ్స్‌కు వచ్చే అత్యధిక ఆదాయానికి కారణమైన కార్డియాలజి విభాగం క్యాథ్‌ల్యాబ్‌ మూతపడి వారం రోజులవుతోంది. మూడు క్యాథ్‌లాబ్‌లు ఉన్నప్పుడు కార్డియాలజి విభాగానికి రోజుకు 50 మంది మాత్రమే వచ్చేవారు. ఈ విభాగంలో నాలుగు యూనిట్లు ఉన్నాయి. ఇప్పుడు రోజుకు 200 మంది రోగులు వస్తున్నారు. ఇందులో 25 మంది అడ్మిట్‌ అవుతారు. వీరందరికి క్యాథ్‌ల్యాబ్‌లో యాంజియోగ్రాం చేయాల్సి ఉంటుంది. రేడియోలజి విభాగం వారిని బతిమలాడి యాంజియోగ్రాం చేస్తున్నారు. శుక్రవారం యాంజియోగ్రాం జరగలేదు. శనివారం 10 మాత్రమే జరిగాయి. మళ్లీ సోమవారం కూడా 10, 15 మాత్రమే జరుగుతాయి. మిషన్‌ చెడిపోయి రోగులు యాంజియోగ్రాం, యాంజియోప్లాస్టీ కోసం రెండు, మూడు రోజులు ఎదురు చూడాల్సి వస్తుంది. విధిలేని పరిస్థితుల్లో కార్డియాలజి విభాగం డాక్టర్లు ఓపి చూసి రోగులను పంపిస్తున్నారు. ఏడేళ్ల నుంచి కొత్తవి ఎందుకు కొనలేదు?. ఇప్పుడు చెడిపోయిన క్యాథ్‌ల్యాబ్‌ మిషన్లను గతంలో బ్యాంకు రుణం ద్వారా తీసుకున్నవే. రుణం ఇవ్వడానికి ఆంధ్రబ్యాంకు ముందుకు వస్తున్నా నిమ్స్‌ మాత్రం సిద్ధంగా లేదు. నిమ్స్‌ స్వయం ప్రతిపత్తి సంస్థ. ఆసుపత్రి అభివృద్ధికి ఎప్పుడైనా నిర్ణయాలు తీసుకోవచ్చు. కొత్త క్యాత్‌లాబ్‌మిషన్లు కొనవద్దని గతంలో ఏ ముఖ్యమంత్రైనా అడ్డుపడ్డారా? ఇప్పుడు ఎవరు అడ్డుతగులుతున్నారు? ఆసుపత్రి అభివృద్ధికి ఎవరు అడ్డుపడుతున్నారు? అనే ప్రశ్నలు తలెత్తుతున్నాయి. ఏడేళ్ల నుంచి కాగితాలమీదనే కొనగోళ్లు జరుగుతున్నాయి. పరికరాలు కొనుగోళ్లకు నిపుణుల కమిటీ ఉన్నది. మూడు రోజులు సమావేశమైతే కొత్తవి కొనొచ్చు. నిపుణుల కమిటీ అడ్డుపడుతుందా? అభివృద్ది నిరోధక కారకులు ఎవరు? నిమ్స్‌ అధికారులు ఒక సారి ఆత్మపరిశీలిన చేసుకోవాల్సిన అవసరముంది. డైరెక్టరు అవినీతిపరుడు కాకపోవచ్చు, కానీ ఏ పని చేయకుండా, చేతులు కట్టుకుని కూర్చోవడం, ఇంత జరుగుతుంటే తమాషాలా చూడటం కూడా తప్పుకింద లెక్క అని ఒక వైద్యుడు వ్యాఖ్యానించాడు.
'డబ్బులు చెల్లించినా నరకం చూస్తున్నాం'
నిమ్స్‌లోని డయాలసిస్‌ కేంద్రంలో రోజూ 175 డయాలసిస్‌లు జరుగుతాయి. గత కొంత కాలంగా డయాలసిస్‌ కోసం అవసరమయ్యే డైలేజర్‌ ట్యూబుల కొరత ఉంది. వీటిని కొనడం లేదు. డబ్బులివ్వకపోవడం సరఫరా ఆగింది. గురువారం డైలేజర్‌ ట్యూబులు లేక రెండు మూడు గంటలు డయాలసిస్‌ ఆగిపోయింది. శుక్రవారం 100 ట్యూబులిచ్చారు. అవి ఆ రాత్రికే అయిపోయాయి. శుక్రవారం రాత్రి నుంచి శనివారం మధ్యాహ్నం 12 గంటల వరకు డయాలసిస్‌ మొదలు కాలేదు. శనివారం మధ్యాహ్నం 150 ట్యూబులు వచ్చాయి. శనివారం రాత్రికి ఇవి అయిపోతాయి. శనివారం రాత్రి నుంచి సోమవారం ట్యూబులు వచ్చే వరకు డయాలసిస్‌ ఆగుతుంది. కొసిరి కొసిరి మరీ 100, 150 ఇస్తున్నారు. చేసేదేమి లేక కొంత మంది బయటికి వెళ్లి రూ.2500లకు డయాలసిస్‌ చేయించుకుంటున్నారు. 'ఇంత నరకం ఎక్కడ చూడలేదు. పైసలు తీసుకుని కూడా డయాలసిస్‌ చేస్తలేరు. డయాలసిస్‌ ఆలస్యమైతే ఆరోగ్యం సమతుల్యత దెబ్బతినే అవకాశముంది. ఇది రోగిహక్కును హరించడమే. డబ్బులు చెల్లించినా నరకం చూస్తున్నాం. డాక్టర్ల కోసమే ఇక్కడి వస్తున్నాం ' అని ఒక రోగి ఆవేదన వ్యక్తం చేశారు. 'నాకీ మాయరోగం వచ్చించి. చచ్చిపోయినా బాగుండేది. కిడ్నీ జబ్బు వచ్చింది. ఏడాదిన్నర నుంచి డయాలసిస్‌ చేసుకుంటున్నాను. ఇంత ఇబ్బంది ఎప్పుడూ పడలేదు. రెండతస్తులు ఎక్కి ఉదయం 8 గంటలకు వస్తే ట్యూబులు లేవని అంటున్నారు. పెళ్లీడుకొచ్చిన పిల్లల కోసం బతుకుతున్నాను. ఏసి గదుల్లోని కూర్చునే అధికారులకు మా ఇబ్బందులు ఏం తెలుస్తాయి. ' అని కంటతడిపెట్టారు డయాలసిస్‌ చేసుకునే ఒక మహిళ.
మళ్లీ ఆ నలుగురే.....
నిమ్స్‌లో ఏ చిన్న ఫైలు కూడా కదలడం లేదు. ఏ ఫైలు కూడా డైరెక్టర్‌ చూడటం లేదని వైద్యులు ఆరోపిస్తున్నారు. ఒక్క వస్తువు కూడా కొనడం లేదు. పేషెంట్‌ డిశ్చార్జి సమ్మరికి అవసరమయ్యే పేపర్‌కూ కరువొచ్చింది. డాక్టర్లే పేపర్లు కొనుకొచ్చి సమ్మరి ప్రింట్‌ ఇస్తున్న పరిస్థితి నెలకొన్నది. డైరెక్టర్‌ ఎంతసేపు డబ్బులు పొదుపు చేయాలంటారు. నిమ్స్‌కు డబ్బులొచ్చే క్యాథ్‌ల్యాబ్‌, డయాలసిస్‌ను పట్టించుకోకుంటే డబ్బులు ఎక్కడి నుంచి వస్తాయి? దాతలు విరాళాలు ఇస్తారని ఎదురు చూస్తున్నారు. ఏం ప్రజాసేవ చేశారని విరాళాలు ఇవ్వాలనేవాళ్లూ లేకపోలేదు. ఇన్నేళ్లుగా నిమ్స్‌లో ఉచితంగా వైద్యం చేయలేదు. ప్రతీ దానికి నిర్ణీత ఫీజు వసూలు చేశారు. ఇక్కడున్న రెసిడెంట్‌ డాక్టర్లు కూడా బతుకు జీవుడా అని బయటికి వెళ్లి ప్రాక్టీసు చేసుకుందామనే ఆలోచనతో ఉన్నారు. 2004 నుంచి 2013 ఆగస్టు వరకు ఉన్న డైరెక్టర్లు ఏ నలుగురిని చేరదీసి నిమ్స్‌ను నాశనం చేశారో, ఆ నలుగురినీ ప్రస్తుత డైరెక్టర్‌ డాక్టర్‌ నరేంద్రనాథ్‌ చేరదీస్తున్నారు. నిమ్స్‌ వినాశనానికి ప్రత్యక్షంగా కారణం అవుతున్నారు. ఈ నలుగురు ఉదయం నుంచి ఆయన చుట్టే ఉంటారు. వీరంత ఒక కోటరిగా ఏర్పడి డైరెక్టర్‌ దగ్గరికి ఎవర్నీ రానివ్వరు. సమస్యను చెప్పనివ్వరు. ఒక్క ఫైలునూ కదలనివ్వరు. ప్రతీ కమిటీలో వీళ్లే ఉంటారు. ఆ కమిటీని ముందుకు వెళ్లనివ్వరు. డైరెక్టర్‌ నుంచి వచ్చిన ఫైళ్లలో డబ్బులొచ్చే ఫైళ్లను మాత్రం చూసి మిగతావి పక్కన పడేస్తున్నారు. నిమ్స్‌లో వీళ్లే చక్రం తిప్పుతుంటారు. తన నుంచి వెళ్లిన ఫైలు ఏమైందని కూడా అడగడానికి కూడా డైరెక్టర్‌ ఆసక్తి చూపడం లేదు.
ప్రస్తుతం రాష్ట్రంలో రాష్ట్రపతి పాలన కొనసాగుతోంది. గవర్నర్‌ పరిపాలన వ్యవహారాలు పర్యవేక్షిస్తున్నారు. ఇప్పటికే కొరడా ఝలిపిస్తున్నారు. నిమ్స్‌పై గవర్నర్‌ దృష్టిపెట్టి, చర్యలు తీసుకుని, లోపాలను సరిచేస్తే రోగులకు మెరుగైన వైద్యం అందుతుంది.