ఆదాయం ఉన్నా..అభివృద్ధి సున్నా

ఇది నిమ్స్‌ కార్డియాలజీ విభాగం దుస్థితి
 -ఒక్క క్యాథ్‌ల్యాబ్‌తో నెట్టుకొస్తున్న వైనం
 ప్రజాశక్తి - హైదరాబాద్‌ బ్యూరో
      నాణ్యమైన, నమ్మకమైన వైద్యానికి పెట్టింది పేరు హైదరాబాద్‌లోని నిజామ్స్‌ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ (నిమ్స్‌). నిమ్స్‌ చుట్టుపక్కల ఐదారు పెద్ద కార్పొరేట్‌ ఆసుపత్రులున్నా చాలా మంది నిమ్స్‌కు రావడానికి ముఖ్య కారణం ఇక్కడ పనిచేసే డాక్టర్లపై నమ్మకం ఉండటమే. అన్ని విభాగాల్లోకెల్లా నిమ్స్‌కు సమకూరే ఆదాయంలో 40 నుంచి 50 శాతం కేవలం కార్డియాలజి, కార్డియోథొరాసిక్‌ సర్జరీ విభాగాల నుంచే వస్తోంది. అయినా పదేళ్లుగా కార్డియాలజి విభాగం అభివృద్ధికి నోచుకోవడం లేదు.
కార్డియాలజి విభాగంలో ఇంతకు ముందు మూడు క్యాథ్‌లాబ్‌లు ఉండేవి. సర్వీసు పూర్తవడంతో రెండింటిని మూసేశారు. నిమ్స్‌లో ప్రస్తుతం ఒక్క క్యాథ్‌ల్యాబ్‌ ఉన్నప్పటికీ మంచి వైద్యం చేస్తారనే ఆశతో చాలా మంది ఇక్కడికే వస్తున్నారు. పని భారం ఎక్కువైనా, రోగుల తాకిడి ఉన్నప్పటికీ కార్డియాలజి విభాగం వైద్యులు ఆలస్యమైనా ఆ రోజు వచ్చిన కేసులను ఆ రోజే పూర్తి చేస్తున్నారు. రాత్రి 8 గంటల వరకు పనిచేసిన రోజులున్నాయి. ఇందుకు వీరిని ప్రత్యేకంగా అభినందించాల్సిందే. గుండె సంబంధ సమస్యలను గుర్తించడంలో క్యాథ్‌ల్యాబ్‌ కీలకమైంది. ఇందులో యాంజియోగ్రం చేస్తారు. తర్వాత గుండె జబ్బు తీవ్రతను బట్టి బెలూన్‌ యాంజియోప్లాస్టీ, స్టెంట్‌ యాంజియోప్లాస్టీ చేస్తారు. యాంజియోగ్రాం, యాంజియోప్లాస్టీ చేయించుకునే రోగులు ఉదయం నుంచి ఎలాంటి ఆహారం తీసుకోకూడదు. తమ వంతు వచ్చే వరకు ఎదురుచూస్తూనే ఉండాలి. ఒకటే క్యాథ్‌ల్యాబ్‌ ఉండటం వల్ల కొన్ని సార్లు రోగులు ఇబ్బందులు పడ్డ సందర్భాలున్నాయి. క్యాథ్‌ల్యాబ్‌లో యాంజియోగ్రాం, యాంజియోప్లాస్టీ జరుగుతున్న సందర్భంలో అత్యవసరంగా గుండెపోటు కేసులు వస్తుంటాయి. దీంతో చేస్తున్న కేసును పక్కనపెట్టి అత్యవసర కేసుకు ప్రాధాన్యత ఇచ్చి యాంజియోగ్రాం నిర్వహించాల్సిందే.
నిర్లక్ష్యానికి నిలువుటద్దం
ఆదాయం విషయంలో కార్డియాలజి విభాగం ఎప్పుడూ మొదటి స్థానంలోనే ఉంటోంది. సాధారణంగా కార్పొరేట్‌ వైద్యరంగంలో ఒక విభాగం నుంచి అత్యధిక ఆదాయం వస్తుంటే ఆ విభాగం అభివృద్ధికి, మౌలిక వసతులు, సదుపాయాలపై ప్రత్యేక దృష్టిపెడతారు. విస్తరణ చేపడతారు. కానీ నిమ్స్‌లో మాత్రం గత 10 ఏళ్లుగా కార్డియాలజి విభాగం మాత్రం నిర్లక్ష్యానికి గురైందని చెప్పాలి. ఈ కాలంలో పనిచేసిన డైరెక్టర్లు ఎవరూ దీని అభివృద్ధికి చొరవ తీసుకోలేదనే విషయం స్పష్టంగా కనిపిస్తోంది. నిష్ణాతులైన వైద్యులు, సిబ్బంది ఉన్నప్పటికీ ఒక్క క్యాథ్‌ల్యాబ్‌తోనే నెట్టుకొస్తున్నారు. క్యాథ్‌ల్యాబ్‌లా ఏర్పాటు గురించి ఈ విభాగం నుంచి ప్రతిపాదనలు వెళ్తున్నాయి. కానీ కార్యచరణ కొరవడింది. ఒక క్యాథ్‌ల్యాబ్‌ కోసం సుమారు రూ.4.5 కోట్లు ఖర్చవుతాయని అంచనా. రాష్ట్ర ప్రభుత్వం నిమ్స్‌కు 2013-14 ఆర్థిక సంవత్సరంలో నాలుగు దఫాలుగా రూ.64 కోట్ల ను విడుదల చేసింది. అదనంగా మరో రూ.20.50 కోట్లు ఇచ్చింది. రూ.10 కోట్లు ఖర్చు చేస్తే రెండు కొత్త క్యాథ్‌ల్యాబ్‌లను ప్రారంభించొచ్చు. దీని వల్ల రోగుల సంఖ్య పెరుగుతుంది. వైద్యులు కూడా మరింత ఉత్సాహంగా పనిచేస్తారు. క్యాథ్‌ల్యాబ్‌కు అవసరమయ్యే స్టెంట్లు, క్యాథటర్‌లు, ఇతర పరికరాలు కొనుగోలు చేయడంలో ఆలస్యం జరుగుతోందని సమాచారం. ముందుగానే ఇండెంట్‌ పెట్టినా కూడా అవసరాన్ని బట్టి వెంటనే సరఫరా చేయడంలో స్టోర్స్‌ విభాగం ఉదాసీనంగా వ్యవహరిస్తోంది. కార్పొరేట్‌ ఆసుపత్రులు ఏకంగా స్పెషాలిటీ బ్లాకులను ప్రారంభిస్తున్నారు. ఇందులో గుండె సంబంధ కార్డియాక్‌ విభాగానికి ప్రత్యేక ప్రాధాన్యత ఇస్తున్నారు. రాజీవ్‌ ఆరోగ్యశ్రీకి వచ్చే కేసుల్లో గుండెకు సంబంధించినవే ఎక్కువుంటాయి. సరైన ప్రణాళికతో, ముందుచూపుతో ఆలోచిస్తే ఇప్పటికే నిమ్స్‌ క్యాంపస్‌లో ప్రత్యేక కార్డియాక్‌ బ్లాక్‌ ఏర్పాటై, కనీసం నాలుగు యూనిట్లు పనిచేసేవి. కానీ విభాగాలను అభివృద్ధి చేయడంలో ఇటు నిమ్స్‌కు, అటు ప్రభుత్వానికి శ్రద్ధ లేదని దీన్ని బట్టి తెలుస్తోంది. ఇలాంటి రకమైన విధానాలు అవలంబిస్తే నిమ్స్‌ ఇక ఎప్పటికీ కార్పొరేట్‌ ఆసుపత్రులతో పోటీపడలేదు.
ఆ కారణంతోనే...?
ఒక విభాగం అభివృద్ధి అయి, మెరుగైన వైద్య సేవలందిస్తే ఆ గుర్తింపు డైరెక్టర్‌కు, నిమ్స్‌కే వస్తాయి. కార్డియాలజి విభాగాన్ని అభివృద్ధి చేస్తే ఆ విభాగాధిపతికి పేరొస్తుందని, ఉన్నత స్థాయికి ఎదుగుతారనే అర్థంలేని కారణాలతో కార్డియాలజి విభాగాన్ని పట్టించుకోవడం లేదని విమర్శలున్నాయి. ఇలా వ్యక్తిగత బేషజాలకు పోవడం వల్ల చివరకు నష్టపోయేది రోగులు. ఆ తర్వాత నిమ్స్‌ ప్రతిష్ట క్రమంగా క్షీణిస్తుంది. నిమ్స్‌కు కొంత కాలం అప్పటి ఆరోగ్య, వైద్య కుటుంబ సంక్షేమ శాఖ ముఖ్య కార్యదర్శి పివి రమేష్‌ ఇన్‌ఛార్జిగా పనిచేశారు. ఆ తర్వాత కార్డియాలజి విభాగానికే చెందిన ధర్మరక్షక్‌ డైరెక్టర్‌గా పనిచేశారు. కానీ కార్డియాలజి విభాగంలో ఎలాంటి అభివృద్ధి జరగలేదు. ప్రస్తుతం నిమ్స్‌కు డైరెక్టర్‌గా డాక్టర్‌ నరేంధ్రనాథ్‌ బాధ్యతలు చేపట్టి ఆర్నెళ్లవుతోంది. ఈ సారైనా క్యాథ్‌ల్యాబ్‌లు ఏర్పాటు చేసేందుకు కృషి చేస్తారో? లేదో? వేచి చూడాలి.